1Cor 4 | WSK | STEP | Nina iwita anananga ikialko, ana Kristus ko ura kari, anananga ura mu Kaem ko den yumura te wore balnakko.

1 Corinthians 4

Kari Biya Jesus kota ko ura kariimet nunga tuterukko

1 Nina iwita anananga ikialko, ana Kristus ko ura kari, anananga ura mu Kaem ko den yumura te wore balnakko. 2 Se ura kari nunga munan biya mu iwita: nunga kari biya ura betemonko nunga manarso mu eng diram te betemonko. 3 Se nina agi, ali imi ko kariimet sang aninga ura tutemon ale ko aguwaya balmon, bare ani mu ko ikia me aga morukko. Se ani betelatala agata aga bagara me tutesam. 4 Ani agata aga memek bo ta me ko ikisam, bare ani agata balik ani kari diram ma me balikko. Kari Biya kota aninga tutera kari.

5 Buta se, nina giral ale kari bo ko bagara me tuteralko. Am bagaral se Kari Biya tairukko. Nu ikia munan yumura te tiromorom ningi mu gi nikim te awurokko, ale kariimet nunga ikia nongomang ningi mu gi wetang te awurokko. Se tom mu te Kaem kariimet suwan suwan ko ura ningo agi memek mu baluk ale koma nungarukko.

Corinth Kris alo nunumi patawukasan se ko Paul apostle nunga ura ko duap nunga maonam

6 Aga singsang, nina te ikialko ani den imi ana Apollos ilak nainimi te balem. Se ana te den imi ko nunguning nina ikialko, “Munan den batoga te aniso mu me kiaralko.” Nina nengeta ninimi patawu se bo nup patowaral ale bo me ari maguwuralko. 7 Awuk a? Nina awiri tutera ura umutang beteralko ninga balam a? Mel suen biya Kaem ningaram, se mel awuk bore Kaem nina me ningaram? Se Kaem mel suen biya ningaram, bare awuk se nina mel sumu ko duap iwita ninimi patowasan?

8 Nina maingkala terong maman e? Ale mel suen biya karogo la e? Nina anananga kiaman ale kari bibiya ko aratu muruwuman e? Bare aninga angamang mu nina nunguningta kari bibiya ko aratal agi mu, ana agotala nengerak kari bibiya ko baganakko! ^{▼▼1 Cor 4:8 Corinth Kris alo nunga ikia mu Laodicea Kris alo nunga ikia turan: Revelation 3:17.} 9 Bare ani ikiem, Kaem ana apostle ura betenakko nanga balam, se ana ura betesan mu ali imi ko kariimet mu ana nangarki maguwusan, ale mel yam ko nanga betesan. Ale kari nunga momon se kuemonko iwita, engel alo nunga nomotam te, se kariimet nomotam te kolara iwita nanga betesan, ale ninguru nanga bita maguwusan.

10 Ana Kristus kowom karosan, se kariimet nangarkasan ale kari ngualara ma nanga balsan. Bare nina mu Kristus te kari ikia bibiya ago e? Ana nosokel mena. Bare nina mu sokel karogo e? Ana kariimet nangarki maguwusan. Bare nina mu ninip bibiya e?

11 Ana ulengkala se aitak betelatala, na ko kuesan, yu ko kuesan, se nanga guang gigira batuwutuk am. Ana ngual ngual nanga mosan kausan, se nangimik wonong mena. 12 Ana nangata nanga nagiting te ura kowar tasan. Ale nanga balu maguwusan mu ana marak den nungarsan. Se nanga bita maguwusan mu ana am iki nobowa nagusan. 13 Aking den memek nangarsan, mu ana koma den ningo lila te nunga manorsan. Tai aitak tom imi te mu, ana ali imi ko mel bunetutuk iwita nainip mena, marok ungi bolala awura ale gi ago nama guringi waru sapara iwitata nanga betesan. ^{▼▼1 Cor 4:11-13 Paul ikup gikaso: 2 Cor 11:23-27. Kris alo ikup gimonko: Rom 8:36. Paul kota ko kuting te ura tokaso: Acts 18:3; 2 Thes 3:8.}

Corinth Kris alo Paul bagoso iwitatala bagomonko

14 Ani nina dolara ningarikko den imi me balsam. Nina aninga kuriang yawara iwita ikia ningarsam. 15 Nina Kristus te ninga bitua kari suen biya agila, bare ninga nenet mu suen biya mena. Mu awuk, Jesus Kristus ko den gilalong yawara mu te ani ninga nenet ko aratem. ^{▼▼1 Cor 4:15 Paul ko ikia, ko gomang: Gal 4:19.} 16 Buta se ani iwita ninga manorsam, aninga bagara aolak arigal ale uwutatala bagaralko. 17 Umutang ko ani aga kuriang yawara Timothy, nu Kari Biya ninguru kowom karoso, mu nengete beterem se namoso. Nu ani Kristus te munan karo tusam, ale sor suen biya te Kris alo nunga kasursam, mu baluk se aking ningamin ares maukko.

18 Saki ikisan ani me nengete tairikko iwita ikisan, ale nunumi ninguru patowasan. 19 Bare ani nengete tairikko tom pingi aram. Kari Biya ko gomang buta aniruk agi mu, ani nengete tairikkowo. Ale tom mu te ani kari nunumi patowasan mu nunga den la me ikiekko, ale ninga nosokel aguwaya wore ago arigekko. 20 Mu awuk, Kaem ko kingdom mu munak la mena, mu noko sokel te. Buta se nina munan awuk bore ani nengete bitirikko kuesan a? Bu giek ale ago nengete tairikko agi, munan lila te se angamang ningaru se nengete tairik e?

21